Үй-бүлөлүк пландаштыруу программаларын ишке ашыруу жана төрөй турган курактагы аялдардын заманбап контрацепция каражаттарына жеткиликтүүлүгүн камсыз кылуu энелердин өлүмүн, бала өлүмүн жана абортторду кыскартууга чоң таасирин тийгизет. Бул төрөлүүнүн ортосундагы убакытты туура тандоого, пландалбаган кош бойлуулукту азайтууга жана кооптуу абортторду алдын алууга шарт түзөт.

2017-жылы Кыргыз Республикасынын Өкмөтү «Үй-бүлөлүк пландаштыруу 2020» (ҮП2020) Глобалдык демилгесине кошулуп, жогорку медициналык жана социалдык тобокелчиликтеги аялуу аялдар үчүн үй-бүлөлүк пландаштыруу кызматтарына жетүүнү жакшыртуу боюнча милдеттенмелерди алган.

2018-жылы Кыргыз Республикасынын Саламаттык сактоо министрлиги алгач ирет мамлекеттик бюджеттен 3,2 миллион сом (АКШнын 42 000 долларына барабар) бөлүп, аялуу аялдар үчүн контрацепция каражаттарын сатып алууну камсыздаган. Бул алардын пландаштыруу каражаттарына жетүүсүн жакшыртат жана репродуктивдик тандоо укуктарын жүзөгө ашырууга шарт түзөт.

Ар бир милдеттенменин аткарылышын көзөмөлдөө үчүн өлкөлүк индикаторлордун топтому иштелип чыгып, маалымат берүүчү жооптуу уюмдар аныкталган. Индикаторлор 2019–2030-жылдардагы Кыргыз Республикасынын калктын ден соолугун сактоо жана саламаттык сактоо тутумун өнүктүрүү боюнча Өкмөттүк программасынын жана Туруктуу өнүгүүнүн максаттарынын (ТӨМ) индикаторлору менен шайкеш келтирилген. Индикаторлорду платформадан жайгаштыруу милдеттенмелердин аткарылышынын жүрүшүн ачык-айкын кылып көрсөтүп, бардык кызыкдар тараптар үчүн маалыматка ачык жеткиликтүүлүктү камсыз кылат.